दोन पेगांची नशा ती रिचवणाऱ्यांना विचारा
आठ पेगांची अवस्था बरळणाऱ्यांना विचारा
खूप दिवसांनी जराशी घेत बसले दोस्त होते
बाटली संपेल केव्हा झिंगणाऱ्यांना विचारा
राख झाले पूर्ण बंडल, खोकल्याची ढास आली
घेतले झुरके किती ते फुंकणाऱ्यांना विचारा
तेव्हढे गजरे फुलांचे मनगटाला माळुनी या
रसिकता त्यातील तुम्ही हुंगणाऱ्यांना विचारा
त्रास पत्नीचा किती ते सांगती नवरे जगाला
एकट्याचे दु:ख कोणी ब्रह्मचाऱ्यांना विचारा
वारसा आहे पित्याचा, खोडसाळा, नाव केवळ
माल कोणावर उधळला तीर्थरूपांना विचारा
आमची प्रेरणा - 'विक्षिप्त' ह्यांची गझल प्रश्न
Labels: विडंबन
0 Comments:
Subscribe to:
Post Comments (Atom)