मायना


आमची प्रेरणा : मिलिंद फणसे ह्यांची गझल यातना


फोटोतुनी तुझ्या मी रंगास ना समजलो
तुज, सस्यश्यामले, मी गौरांगना समजलो

साठीत जीवनाच्या, धुंदीत मी सुरेच्या
चष्म्याविना तुला मी नवयौवना समजलो

पाहून तू मला का मिटलास एक डोळा ?
मिटण्यातली धिटाई प्रस्तावना समजलो !

माझेच नाव देसी चिल्लापिलांस अवघ्या
हा डाव का तुझा मी आधीच ना समजलो ?

समजून राम धरले जेव्हा उरी तिने मज
मी अर्थ मत्सराचा, रघुनंदना, समजलो

कळले न आतड्यांचे दुखणे मुळीच त्याला
पाहून डॉक्टराचे बिल वेदना समजलो

झाली क्षमाशिला ती तेव्हाच जाणले मी
परमेश्वरा, खरेदीची योजना समजलो

"सरला", वसंत वदले, "आहे तुझ्यात काही"
"पाहूनिया लिफाफा, मी मायना समजलो"

0 Comments:

Post a Comment



Newer Post Older Post Home

Blogger Template by Blogcrowds