गंड

मी कवी नाही, मला हा गंड आहे
यमकबाजीची तरीही कंड आहे

'र' पुढे 'ट' ठेवुनी उजळून जातो
व्योम कविता; आणि मी मार्तंड आहे!

वाचल्यानंतर शिव्या घालो कुणीही
छापला नुकता दहावा खंड आहे

वृत्त अन् बाराखडी झेपे न जेव्हा
मुक्तछंदातून केले बंड आहे

व्याप्त कवितेच्या जमीनी झोपड्यांनी
पण विडंबन मोकळा भूखंड आहे

काळजी निवृत्त होण्याची कशाला ?
काफ़ियांची बँक आहे, फंड आहे

बोलले काका, विडंबन हे नसावे
ऐकुनी ते, गर्व मम शतखंड आहे

प्रौढ अन् गंभीर कविता शीक, लेका!
लांबले, खोड्या, किती पौगंड आहे...

1 Comment:

  1. नरेंद्र गोळे said...
    तोच काका मी, प्रशंसा काय सांगू
    काव्य शोभे, गर्व जरी शतखंड राहे

    प्रौढ अन्‌ गंभीर कविता का शिकाव्या
    खोडसाळा, बंड तव बलदंड आहे

    छान हझल! सुरेख!!

Post a Comment



Newer Post Older Post Home

Blogger Template by Blogcrowds